நீங்கள் கேட்டவை

திருச்சியைச் சேர்ந்த ரமேஷுக்கு
என் வயதிருக்குமா?

வெள்ளமேடு காவேரி
நிச்சயம் அழகாகத் தான் இருப்பாள்
என்று நினைக்கிறேன்

சவுக்கார்பேட்டை திருநாவுக்கரசு
நடுவயதை தாண்டியவர்
என்று தோன்றுகிறது

நாங்கள் நால்வரும்
விரும்பிக் கேட்ட பாடல்
வானலைகளில் தவழ்ந்து வருவதாக
சொன்னாள் வானொலி தொகுப்பாளினி

திடீரென நெருக்கமாகி விட்டோம்
நாங்கள் நால்வரும்

அவர்கள் மூவரும்
கேட்டுக்கொண்டிருக்கிறார்களா
பாவம்
தெரியவில்லை

நால்வருக்கும் சேர்த்து
நானே கேட்கத் தயாரானேன்
காற்றலையில் மிதந்த வரும் பாடலை