Posts Tagged ‘குட்டிக்கவிதை’
சொல்லியிருக்க வேண்டாம்
ஊரடங்கியபின்
அகன்ற வீதியை
பெருங்குரலெடுத்து குரைத்தபடி
ஒற்றை நாய்
கடந்து செல்கையில்
நினைத்துக் கொண்டிருந்தேன்
நீ சொல்லிவிட்ட
அந்த சுடுசொல்லை.
______________________________________________
கொசுறு: குறுந்தொகை எஃபெக்ட் ? (பாலைத் திணை – தலைவி கூற்று) 
______________________________________________
புகைப்படம்: http://www.lightalongthejourney.com
குட்டிக்கவிதைகள்
மௌனத்தை
கிழிக்கிற
சத்தம்
அடங்கியபின்
அதை விட சத்தமாய்
மீண்டும்
அறையும்
மௌனம்.
———-
குழந்தைகள்
போட்டிக்கு இல்லாத
இரவில்
பூங்கா ஊஞ்சலில்
ஆடுகிறது
காற்று.
———-
இலை சிந்தும்
மரமொன்றை
படமாக
வரைந்து வைத்தேன்
அதை யார் யாரோ
எடுத்துப் பார்க்கையிலெல்லாம்
விழுந்தது
இன்னுமொரு இலை.
——–
ஆற்றைத்
தொட்டும் தொடாமலும்
பறக்கிற
பறவையுடன்
போட்டியிட்டு
நீந்துகிறது
அதன் நிழல் மீன்.
